係小弟日本旅行緊果陣，Netflix上映左一部以1975年上映同一題材既電影〈新幹線大爆破〉的續集，呢套電影成為左我回程航班果陣既節目。同之前睇過既日本電影做對比，今次既節奏感算係緊湊，而且說教味都少左好多。

今次電影同1975年果套既最大分別就係今次有埋JR東日本既支持，可以係新幹線E5系列車，同埋鐵路設施度拍攝。劇情入面內容就唔多講啦，有興趣可以自行上Netflix度睇下😂。

主要角色其實係
．JR東日本控制中心既職員 – 用盡專業既方式去避免列車減速至100 km/h而引爆炸彈
．日本政府代表 – 廢而且無能既
．「隼60號」車掌/列車長 – 用盡專業既方式去服務車上乘客
．車上國會議員/名作家/網紅 – 不怕事態嚴重，抽水就叻，有幾次更加搞到乘客情緒走向崩潰，仲要令到小野寺柚月一下子㩒左緊急掣
．小野寺柚月 – 一位因為家庭影響而令情緒受影響，本身諗住一齊同「隼60號」一齊陣亡，而且係呢單爆炸案既主謀
．市川櫻 – 一位善良既老師，一直到最後一刻都係小野寺柚月身邊保護住佢既安全

而且套戲入面仲有唔少令人彩蛋，
．用左KATO模型黎係控制中心用模擬，用另一部列車用倒後行既方式追上「隼60號」黎進行「過客」，同埋用黎測試可唔可以令到行駛中既列車出軌。
．竟然仲搵左時速達400 km/h既試驗列車ALFA-X E956型 黎同「隼60號」平排行車，運送物資。
．以專業既方式黎用「鐳射測距儀」黎量度兩車之間既距離。

但最唔明既地方就係到左最後準備係鷲宮一條側線度令列車爆炸果陣，小野寺柚月又會願意聽返老師既說話，同埋留返係「隼60號」上面既最後6位乘客同埋車掌，列車長一齊，呢度會唔會係導演想留返個引子俾下一集？

另外都分享一下關於新幹線既一個冷知識。雖然新幹線開通左50年，但50年來新幹線都一直未能夠由札幌一直去到鹿兒島。
背後既原因係因為JR東日本同JR東海兩間公司所使用既訊號系統，ATC不兼容。而且仲有一大問題係供電網絡有分別，JR東日本使用50 hz，而JR東海使用60 hz，雖然E2系同E7系列車可以同時對應到兩個供電系統，但訊號問題真係有排都解決唔到。
除非好似當年香港既直通車咁安裝住兩套訊號系統黎解決問題喇😂。

• 肥宅日常