//如果我聽歌可眼紅 何以待你好偏不懂
自細做過多少美夢 慈悲的偉論 連乞丐喊窮心也痛
竟怕放懷擁抱你 讓你露歡容
追悔無用 轉眼發現 你失蹤//

陳奕迅喺2009年推出嘅於心有愧，本身係我其中一首聽到會好感觸嘅歌，估唔到今日睇完嘅一場港產電影覺得令到個人好似如釋重負咁樣。

呢幾年香港電影因為有高登先嘅努力支持先至有機會令到更加多人留意，今日同朋友揀咗去睇最新上映嘅<贖夢>，當然揀左即將於月尾結業嘅新寶戲院。

睇之前當然都有睇過唔同影評，電影嘅劇情緊湊而且亦都穿插咗唔同嘅夢境同現實嘅故事情節，令到觀眾都有啲緊張嘅感覺。

電影主線就係講緊一個精神科文醫生（劉俊謙飾演）同一個經常發惡夢嘅夜間的士司機蔡辛強（張家輝飾演），喺的士上嘅偶遇直至的士司機發生意外之後文醫生幫佢嘅診治，一步一步揭開咗蔡辛強內心嘅秘密，一步一步咁令蔡辛強得到救贖。

原來文醫生自己背後都有一個惡夢，惡夢嘅根源就係自己細個嗰陣做過一件錯事引致媽媽受苦被爸爸打，最後跳樓自殺，最後佢都係決定向父親坦白事件令到自己得到救贖。

睇緊呢一套戲嗰陣我忍唔住流淚，流淚嘅原因係諗起早幾年因為我嫲嫲患上左腦退化症，有時佢發作嗰陣我對佢嘅唔友善對待，即使而家嫲嫲入咗護老院，每個星期探望佢個陣，睇住佢嘅退化，由岩岩入到院果陣可以自己進食，到而家已經唔再認得我。根本上每一次去護老院探望嫲嫲之後嘅夜晚，我都係會發夢見返當時我對住嫲嫲每一次發脾氣，每一次嘅無禮對待。睇完呢套戲之後，終於明白到原來真誠坦白其實係對自己嘅一個救贖。

到最後希望大家有興趣嘅都可以入戲院睇下呢場戲，令到自己心入面抑壓咗好耐嘅錯誤得到發洩令自己得到救贖。

https://goldenscene.com/movie/549f762f-885e-49a1-8931-49da3a92b269/%E8%B4%96%E5%A4%A2

• 肥宅日常