因為工作伙伴的邀請，上星期襯住周未上左中山玩左兩日，終於有機會再次欣賞闊別多年既孫中山先生故居，岐江橋，石岐步行街，入住中山國際酒店，品嘗到唔同嘅美食，絕對令人愛上中山休閒嘅生活步伐。

當日嘅行程先喺深圳灣關口集合，然後就經過深中通道去咗孫中山先生故居，雖然我喺細個嗰陣都去過兩次，好記得以前只係得故居係景點一部分，但喺2019年參觀嗰陣已經將成條村都已經變成一個景點，同六年前參觀嘅時候都係冇乜分別，只不過喺出面多咗唔同嘅手信店同埋多咗食石岐乳鴿嘅餐廳。

參觀完故居之後我哋就去咗綠野仙踪農莊食午飯，飯局中嘅燒鵝同埋燒蕃薯絕對令人回味無窮。🤤🤤🤤

到咗夜晚就去咗中山國際酒店頂樓嘅旋轉餐廳度食自助晚餐，呢度個特色就係可以360度無死角咁欣賞石岐嘅夜景。雖然餐廳地方比較細同埋食物選擇比較少，但食物質素都算可以，食物嘅補充都快。

食完自助餐之後，我就揀咗夜遊岐江河。行過超過20年冇行過嘅岐江橋，條橋已經修整過，唔同當年細個行過嗰陣可以喺橋上面透過鐵板中間嘅銹蝕窿度望到橋下面嘅河水，亦都冇咗當年巴士過橋產生嘅恐怖嘅震盪同埋聲響。

可惜嘅係石岐步行街仍然繼續裝修緊，只係行咗一陣就去咗隔離嘅興中廣場沿住河邊欣賞唔同嘅表演同埋夜景。因為頭先自助餐食得好飽，本身打算去食雙皮奶都冇去食到🤣🤣

到咗第二日朝早，都喺樓上嘅旋轉餐廳度食咗自助早餐，之後就出發去咗鄔老伯私房菜，食咗佢最有特色嘅雀籠乳鴿。

食完飯之後就去咗朱古力工廠參觀，最後就經深中通道返香港，完結咗呢兩日嘅旅行團。

• 旅行生活