考🚌之路肥左兩次，最後都終於成功係killer手上拎到個牌，今次就係分享下我崎嶇既考試之路。

閉關左兩個星期，當然係有重大任務處理緊喇。為左達成兒時既夢想，由前年已經開始做緊準備。例如先搵朋友借左部5.5噸貨車感受一下一部真正貨車嘅駕駛感覺，而且都睇左YouTube唔少朋友分享嘅學車片，加入學車群組一齊討論下學車考牌嘅秘笈。

香港考商用車得兩個選擇，一係經駕駛學院係沙田或者元朗考車，或者就係跟出面駕駛學校係荃灣考場挑戰惡名昭彰嘅德士古道迴旋處或者人多車多嘅柴灣考場。而我經過深思熟慮之後，決定左係荃灣考場完成挑戰。

我先報名考左中型貨車做考取巴士車牌嘅踏腳石，幸運地遇著一個渣左30幾年貨櫃車嘅教車師傅指導，用佢極嚴格嘅要求，將我以前既壞習慣一一改好左佢。
例如佢要求做泊位調頭果陣只係可以使用俗稱「極力子」嘅離合器，喺一下腳掣都唔洗踩嘅情況下完成呢個基本功。最初我仲未能夠做到「車慢軑快」呢一個基本功下，喺標準考試距離嘅位置度完成到三手軑調頭，到最後可以係一個比標準考試距離仲窄左兩呎嘅地方完成到三手軑調頭。
當然係駕駛果陣，只係得一個車位距離做到兩個離合器嘅動作，完成轉波操作。
所以到最後張「黃紙」只有5個細剔嘅成績，成功1 take pass。

考左中型貨車之後，當然就係向住目標出發，係申請加簽中型貨車車牌果陣，同時間申請埋巴士考試既路票。係得到第一次考期之後，我選擇左 MAN 既棍波巴士應考，呢款車係用左 TGL 12.180 底盤，配上 ZF 6前速手動波箱。部車除左係大窩口做斜路停開果陣要更加講求對於油門，極力子既操控之外，部車係行車表現尚可，只可惜既係呢一部車枝波棍相當之重，每次入R波都要用上全身既力將波棍向左下方推先可以入到波。
係我第一次考試果陣，因為泊位追唔到角入泊位即時肥左，連出街既機會都無埋。
我過左一輪之後就再考第二次，今次成功做到調頭泊位，可以出街，可惜因為一個嚴重失誤肥左。

因為小弟工作既原因，經過左一年時間，加上朋友既鼓勵下，又一次報考巴士，不過今次我揀左宇通自動波巴士。呢一部車操控上比MAN好好多，只不過係因為油門同腳掣既擺位同市面上既巴士大同小異，要重新適應過踩法。（MAN油門同腳掣既擺位類似私家車）

考試當日，同車有另一個師兄考9點幾，而我就考11點幾。我果日朝早7點半就上車操車，返到試場交左部車俾師兄之後，師傅叫我試下一陣師兄上左車就問下可唔可以提前考左佢。好可惜師兄泊位追唔到角肥左，即刻排隊打尖等考試。
等到後補位就上車，三手軑調頭兩個mark都早左停低，好彩仲夠位走去做泊位，阿sir都開窗睇頭轆會唔會撞壆。追正條一尺界就後車，成功追到隻角入位，當然就做返所有足每個步驟停好部車，之後就出街行圈。
當然就做一個死碌神，幾乎每枝燈都慢溜到燈位等轉燈🤣🤣。行楊屋道上山，嘉里倉出面做斜路停開，上次考棍波衰起步溜後，今次轉自動波，起步前睇多次個波檔唔好跳左去空波就放手掣起步。上到葵盛圍有小巴係前面行，緊係攞正牌慢車喇。去到大窩口落山，死亡彎無車黎，追住雙白線慢慢扭，出灣睇左鏡好似踩左兩條黃線，都無計喇，繼續落埋山去挑戰德士古道迴旋處呢個最後大佬。
之前學車反應慢左，出到線部車已經係隔離，今次緊係等多陣見無車沖緊過黎先出，返到試場泊好車等攞成績。

最後都終於pass左🥳🥳

• 肥宅日常