//逛過這世界 才想得起歸家 那街道
愛上最美雪花 但未及摘下 人便老
太多可惜 太少珍惜 藍天碧海 留在旅途
帶不走的 美好的朝與暮//
– 謝霆鋒〈青空〉
對於每個旅程既最後環節，一定係最傷感既時刻，又係時間繼續努力工作，但美好既回憶，永遠都會記係心裡面。
因為我選擇係香港長假期既最後一日先返，基本上每一間航空公司都係收得比平日貴，而且我選擇機票果陣，經濟艙已經無晒位揀，所以我決定俾貴多少少坐皇璽桂冠艙返香港（其實同國泰經濟艙差好少價錢🤣），完美咁同呢一個旅程畫上完美既句號。

之前就講到我享受完長榮航空嘅The Infinity Lounge同埋行完桃園機場免稅店之後，見時間差唔多就去到登機閘口等待登機。
去到登機閘口就見到今日執飛呢一個航班嘅飛機已經到達閘口做緊起飛之前嘅準備工作。

皇璽桂冠艙係長榮航空於787同777-300ER系列嘅機隊先有呢一級別嘅艙等，擁有寬敞舒適而且獨立嘅個人空間，舒服咁享受頂級嘅旅程。
長榮航空對皇璽桂冠艙嘅介紹

咁我係屬於皇璽桂冠艙旅客當然係第一類登機，上咗飛機之後就搵到自己預訂嘅2A座位，空服員第一時間就畀咗杯水同熱毛巾我。因為我冇預先係online check in嗰陣揀定餐，所以同時間亦都問我想食乜嘢主菜，我揀咗魚餐，因為喺台灣除咗喺宜蘭嗰日有食過海鮮之外連續幾日都係食雞豬牛，食到已經有少少口淡淡🤣🤣。

飛機準時出發，最估唔到嘅係喺臨起飛之前竟然喺跑道度見到波音嘅 Dreamlifter 飛機喺出面滑行道，畀拖機拖行緊。有唔少航空發燒友多日咁喺桃園機場守候住呢一架機，希望影到佢嘅一面。

Dreamlifter 補充資料
Dreamlifter 係由波音因應787客機嘅生產而衍生出黎嘅特殊用途貨機，係全球唔同地方嘅工廠將787客機機身，機翼既半成品運送到美國西雅圖埃弗雷特或者南卡羅萊納州北查爾斯頓嘅最終組裝廠完成組裝。Dreamlifter 係利用 原有B747-400客機機身，加埋B747-SP尾翼，係2006年由長榮航太科技（EGAT）負責改裝。呢部飛機最大嘅特係加大左嘅貨艙空間，特別嘅貨艙門開啟方法（機尾艙門以橫向的方式打開），同埋全球只有4隻同型號飛機。而類似嘅特殊用途貨機就係 Airbus 嘅 A300-600ST 「大白鯨」同埋 A330-700L 「超級大白鯨」貨機，作用都係負責運送機身，機翼既半成品到法國圖魯斯或者德國漢堡組裝廠完成組裝，可惜後者只會係歐洲範圍內飛行，唔似 Dreamlifter 咁樣會飛長途跨洲飛行。

因為航程比較短，未熄左安全帶燈就已經聽到空服員係廚房準備緊派餐工作。飛機餐嘅份量雖然睇落好似好細份咁樣，但係每一度餸都令人有驚喜，例如前菜嘅沙律，蝦肉係非常之鮮甜，如果將青檸汁加埋落去個沙律度，味道更上一層樓。到咗主菜部分啦，鱸魚煎得亦都唔會過咗火，可惜味道相對鹹咗少少，要連埋啲薯仔一齊食先至平衡到個香味。但係個香蒜醬汁非常之好味道，食到最後我忍唔住用個麵包去點個醬汁嚟食。

波音787最有特色嘅變色舷窗，利用電致色變功能調校光暗，將佢撳到最強可以好有效咁遮擋住太陽嘅照射，但依然可以睇到窗外嘅景觀。

慶幸返到香港嘅巴士唔係龍運嘅B8L，唔洗坐硬到飛起嘅Lazzerini Ethos 或者Vogel Revo 座椅🤣🤣。否則就同喺台灣坐嘅B8R旅遊巴打成一個首尾呼應🤣🤣。

後記
今次嘅台灣之旅終於完結，成個旅程最令到我意想不到嘅地方竟然係可以重新思考人生未來方向，改寫自己人生。如果唔係有今次旅程，可能唔會有〈肥宅日常〉呢一個網站，小弟依然係一個朝9晚7既地盤佬，人生依然淨係得一份工作，空閒時間只會繼續浪費。係未來我會繼續每星期四同大家分享下唔同既好去處，希望大家繼續關注呢個網站。

如果大家想重溫返小弟今次嘅遊記，可以chick下面既link：
乘機報告 – EVA AIR BR858
淡水行•淡海輕軌•淡水漁人碼頭
宜蘭‧花蓮‧Kavalan酒廠 Day Tour

Kavalan威士忌酒廠見學
誠品行旅•松山文創園區
大吉富豪B8R之旅
The Infinity Lounge初體驗

• 旅行生活