去到旅程嘅最後一日，執好行李之後就起身落去樓下酒店餐廳食早餐，食完早餐之後就去咗check out。由台北市區前往桃園機場可以選擇由台北車站出發既桃園捷運或者國光客運既1819線。而我就揀咗去附近市府轉運站到等1960線，由市府轉運站去到桃園機場。因為去到車站果陣上一班車已經開出，所以我只能夠等待下一班車。
市府轉運站位置：https://g.co/kgs/hc1mk56

市府轉運站嘅樓上就係台北w酒店同埋統一時代百貨嘅台北店，前一日我都經過呢一度去行過入面嘅百貨酒店，並且係入面其中一間叫做咖樂迪既日式自家烘焙咖啡店度買咗d咖啡豆返香港品嚐，可惜佢仲未有得網購再直送黎香港。
店舖網頁：https://www.kaldi.tw/

呢條路線係由大有巴士負責，詳細嘅時間表同路線圖可以瀏覽有關嘅網站：http://www.airbus.com.tw/WebMaster/?section=59

今次我所坐嘅車係2021年出牌嘅大吉配搭富豪B8R底盤，同香港龍威旅運引入嘅大吉富豪係同一個配搭，只不過係大家嘅配置唔同。

因為大吉汽車於2014年同VOLVO原廠及VOLVO總代理太古集團合作，成為VOLVO瑞典原廠在亞洲唯一授權認證、技術轉移之車體廠，所以呢一部車順理成章咁將頭尾幅使用左Volvo 9700車身設計，而車身當然用返傳統台灣旅遊巴嘅錯層巴士設計。呢一部車於2023年出牌，使用Volvo D8K350 EU-VI TR25 350匹歐盟六型環保引擎，VOLVO i-Shift AT2412F 12前4後半自動波箱，喺香港嘅B8R暫時都冇咁嘅波箱配搭（主要用ZF 6前1後自動波箱），只有喺最高級嘅B11R先至會用上i-Shift波箱。

小弟有慶於2023年9月參與租租巴既大吉B8R 首航禮，奉上當日活動時影落既部分相片做對比。另外，香港第二部大吉B8R已於今年6月頭到達香港，希望大吉汽車可以對香港旅遊巴市場投入更多新面貌。

上車俾錢跟住司機就會幫你將行李攞去行李倉入面，上車之後就自行選擇你想坐嘅座位，我當然揀咗車頭嘅位置啦，望一望個車箱內籠其實就同香港嘅大吉富豪差唔多只不過呢一部車使用嘅係1+2座位配搭，而香港見到嘅就係3+2位嘅配搭。
部車準時就開出，途中經過幾個站點包括君悅酒店然後就會去到台灣嘅桃園國際機場，呢一個班次直接就去到第二航站。

我坐過香港既B11R配i-Shift波箱，可能係車長駕駛習慣同埋波箱反應影響，行車時候會因為路面情況經常加減車速，加上波箱經常轉波而令到部車變到間中會chok到飛起。反觀呢一程車因為車長駕駛技術同動力配搭都非常之舒服，所以我喺車入面都忍唔住瞓著咗😅😅，所以行車途中我冇乜點影到相。

呢一篇文就去到呢度下一篇就會分享我乘坐長榮航空嘅商務艙體驗

• 旅行生活