喺分享完我係旅程入面玩過嘅唔同地方之後，不如就分享下我今次選擇入住嘅酒店啦。

作為一個偽文青，加上我都相對比較遲決定呢一個行程，所以基本上我喺台北可以揀嘅酒店都係有限嘅，當我喺 expedia 度發現咗一間叫誠品行旅嘅酒店，而且佢嘅位置就貼近喺起緊嘅台北大巨蛋，松山文創園區附近，對面仲要有一個國家鐵路博物館。睇落呢度好似幾吸引下，所以我一於決定拍板book咗呢間酒店。
酒店網站：https://www.eslitehotel.com/

因為我check in嘅時間已經係講緊半夜嘅一點，所以我只係上到房求其影咗幾張相做紀錄跟住就瞓覺。當然作為一家五星級嘅酒店，兩張大床連埋一個露台仔絕對係標配啦，廁所仲要有浴缸企缸最特別嘅係用咗日式廁板，埋到去廁所嗰陣係可以暖笠笠咁坐低享受暢快嘅解放。
除左一間咁大既房之外，樓下入口處有一個巨大既閱讀空間，可以俾你揀返本書慢慢睇。而酒店既早餐係半自助方式進行，你可以揀一份正餐，再自己出去揀麵包，咖啡，茶同一d熱食。

去到先至留意到原來對面嘅國家鐵路博物館原來仲喺度興建緊暫時仲未完全開放，依家只有少部分展覽區域開放俾大家，而且需要預約入場😅😅，所以只能夠喺露台望過去對面嘅台北機廠範圍，間中仲聽到工程所發生嘅噪音。翻查資料，預計將會係2027年就可以全面開放，希望到時有機會再去一次參觀。
國家鐵路博物館網站：https://www.nrm.gov.tw/

當然起咗身之後就過去附近嘅松山文創園區參觀下啦，當日見到喺度推廣緊Volvo XC60私家車，跟住就行下附近嘅園區四圍搵下路。松山文創園區前身係1939年啟用、1998年停產既松山菸廠，係2001年由台北市政府指定為第99處市定古蹟，並於2010年正式轉型及定為現名。松山菸廠跡地在戰後種植大量植栽，停產後一度成為台北市東區最大的綠地；轉型為文創園區後，成為台北市東區重要的公共藝文設施。
松山文創園區網站：https://www.songshanculturalpark.org/

當然啦亦都分享一下隔離誠品生活松菸館，最基本嘅就係誠品書店啦，入面嘅由地牢到2樓都係百貨公司就主，而二樓有部分就係誠品嘅文具館，入面有唔少嘅特色文具仲有鋼筆可以買到，而3樓就係書店範圍。地牢嗰層主要就係食肆，如果去嗰度亦都揀咗兩間餐廳食過，一餐係晚餐另一餐係下午茶。入面仲有依家係台灣好出名既手信「海邊走走」其中一間分店，可以順手買埋用最天然的食材製作美味蛋捲帶返香港做手信。小弟親身品嚐過，經典肉鬆蛋捲同芝麻愛餡蛋捲都非常好味道，我都買左返幾盒香港做手信送俾朋友。
誠品生活網站：https://meet.eslite.com/tw/tc/store/20180220034
海邊走走網站：https://www.hiwalk.co/

其中一日嘅下午茶就去咗 ComeTrue CAFE，呢一間係咖啡為主題嘅餐廳，嗰日我揀咗一杯梅醺琥珀同埋一個熔岩焦香布蕾梳乎厘做我嘅下午茶。梅醺琥珀係一杯用綠茶做基底再加入香甜梅酒做調和，再配搭濃縮咖啡。飲嗰陣就先將奶泡向下攪勻跟住就一齊飲，入口係充滿好香甜嘅蜂蜜同梅酒味仲有清淡嘅綠茶味令人回味無窮。梳乎厘上面嘅焦糖令到梳乎厘食落口係充滿口感，同埋有豐富嘅層次感。
ComeTrue CAFE網站：https://www.cometrue-coffee.com/

有一晚我就選擇去附近嘅地方行下，嗰度係一個類似佐敦八文樓嘅相對有密集舊屋嘅地方，地下都有唔少嘅餐廳可以選擇，本身都有諗過係入面是旦揀一間食飯，但見到有一間便當有唔少人幫襯，一於買左一份帶返酒店食。途中行過嗰陣見到有兩隻鴨仔喺馬路上行走，係文創園區入面既吉祥物之一。
Google Map位置：https://maps.app.goo.gl/AJAVywvorhQae7i36

• 旅行生活