喺行程嘅第一日，我係酒店瞓醒果陣已經係一點幾，酒店嘅早餐一早已經結束咗，所以我就選擇出去附近嘅餐廳度食嘢。當然梗係要試下台灣嘅Sukiya，因為香港嘅分店長期都要排隊，而我又唔會專登去為左試一間餐廳而去排隊😅

食完之後就不如試下係2018年開通嘅淡海輕軌，我對上一次去台灣嗰陣呢條輕軌依然係建設緊。所以我就有國父紀念館站開始搭捷運去到紅樹林站，去到之後就轉咗坐淡海輕軌，捷運搭車嘅時間用咗接近個半鐘頭。呢條線如果你上去北投浸溫泉的話都係會非常之方便，因為今次旅程只係得我一個人，所以我就冇揀去北投浸溫泉啦，呢啲嘢都係留返下次有機會先至去。

當我去到紅樹林站落車，跟指示牌去到隔離高架車站到上咗部準備開出嘅淡海輕軌，呢條線所有車都係2016至2017年由台灣車輛製造，以五輛一列嘅編組。

以一個生活喺大西北由細到大都搭過唔少輕鐵出入嘅新界牛黎講，呢一款車畀我嘅感覺就係同輕鐵差唔多，不過內籠上佢以多數嘅座位為主，可能相對嘅客流量冇輕鐵咁痴線啦🤣

佢頭七個站都係位於高架橋上面，當然最特別嘅係紅樹林到崁頂呢幾個站嘅月台都有同幾米合作做左d作品，可惜我冇特別留意😭

去到淡水漁人碼頭站，就係藍海線嘅終點站，可惜呢個站其實同真正嘅淡水漁人碼頭仲有一段嘅距離，落咗車之後仲要步行一段時間先至去到漁人碼頭嘅。因為嗰日嘅天氣都好舒服所以我就揀行過去睇下啦。

黎到漁人碼頭當然就係去最著名嘅情人橋行下，可惜一個人行就冇乜feel，希望下一次黎果陣唔會得自己一個人喇。

雖然依家仲係4月，但已經熱到爆炸，當然搭返巴士出去淡水。因為我今日太遲出嚟，唔夠時間去埋紅毛城參觀，所以我就搭返捷運返去台北市區。

返去寫呢一篇遊記嗰陣，睇返唔同嘅新聞，原來淡海輕軌都已經規劃咗會延長去對面嘅港口碼頭同埋最多遊客會去嘅淡水老街，紅毛城，希望到時更加方便唔使坐咁耐車程只係去到淡水其中一個景點。
相關報導：https://www.cna.com.tw/news/asoc/202403280196.aspx

• 旅行生活