相信每一個威士忌愛好者，都會希望能夠前往威士忌酒廠參觀，係一個咁靚嘅地方欣賞神聖嘅產物，今次我就嚟到台灣嘅金車Kavalan酒廠參觀。

上文講到我哋去完粉鳥林之後，就去咗Kavalan威士忌酒廠參觀，呢一篇就去分享入面嘅見聞，同值唔值得大家專程入去。
睇文之前先講下Kavalan酒廠嘅背景，建立於2008年，係台灣第一座威士忌酒廠，另一座係位於南投縣既台酒南投酒廠，其出品係OMAR威士忌，小弟曾經有幸品嚐過其出品既OMAR Single Malt Whisky(Sherry Type)，酒中獨有淡淡既龍眼果香口感絕對令人回味無窮，希望下一次去台灣有機會去下OMAR酒廠參觀。Kavalan酒廠利用宜蘭縣地理優勢，使用中央山脈同雪山山脈純正嘅水源釀做台灣生產嘅威士忌。成個工廠生產工序包括：磨碎、糖化、發酵、蒸餾、熟成、調配，從而生產出富有台灣獨有口味嘅威士忌，而且佢亦都係全台灣第一座自己進行燒桶嘅酒廠。Kavalan酒廠亦都成功地多次奪得唔同級別威士忌酒嘅獎項。

到達咗酒廠，之後我哋就去到入面嘅伯朗咖啡館享用咖啡做下午茶，再食返少少小食打底，跟住我哋就落去樓下試飲威士忌。

而入面可以提供四個款式嘅威士忌畀你試飲，而我就選擇咗：層豐雪梨三桶單一麥威士忌，同埋Vinho葡萄酒桶威士忌原酒。
第一杯飲落，充滿咗果香既甜味，仲有肉桂既辛香味。而第二杯飲落口感甘甜，帶有杏仁同埋朱古力嘅味道，味道係相對濃郁。可惜限於香港入境法例嘅限制，我只可以選擇一升嘅烈酒入境，最後我只能夠選擇帶一支威士忌返香港。

我哋試完酒，買完酒之後，當然就去另一個更加重要嘅環節，就係去參觀下佢嘅威士忌生產線。今次我哋只能夠去睇入面嘅一部分生產線，就係威士忌蒸餾廠同埋小部分嘅熟成廠。由於當日有部分嘅酒廠例如烤桶區裝瓶區並冇對外開放所以無法入內參觀。我哋先進入咗蒸餾廠，入到去先見到有唔同嘅展品介紹威士忌嘅歷史，生產方法，仲有唔同橡木酒桶對威士忌出品顏色變化嘅影響。最令我估唔到嘅係入面有唔同嘅穀物，例如麥芽玉米之類嘅原料，可以畀我地親手觸摸。

睇完啲咁沉悶嘅文字之後當然就要睇下佢哋嘅生產線啦，過程中第一眼可以見到嘅係一個進行糖化嘅機器，第二個過程就係發酵。然後就到酒廠嘅靈魂-蒸餾器，可以見到酒廠擁有兩款唔同款式嘅蒸餾器，第一款係蘇格蘭壺色蒸餾器建造於2016年。根據展覽所提供嘅資料，壺式蒸餾器係經過二度蒸餾，只會攝取精華嘅酒心所以酒體嘅口感口實大順滑嘅油脂仲有芬芳嘅個香同香草味道。而第二款蒸餾器係德式半連續式蒸餾器，呢一隻係最早期引入酒廠嘅蒸餾器。佢係利用唔同嘅回流系統控制回流量只係經歷一次嘅蒸餾程序就可以產生輕型純淨嘅酒體，口感同香氣係充滿花香同果香。

行到最後就可以見到嘅係巨大嘅威士忌儲存倉，入面有大量唔同時間蒸餾出嚟嘅威士忌放喺貨倉入面熟成，可惜入面仲有啲空間正在工程冇辦法對外開放。

而呢一次係我第一次入去威士忌酒廠度參觀，可以見到酒廠嘅規模絕對唔細，亦都可以近佢嚟欣賞到成個做酒嘅過程，亦都更加珍惜來之不易嘅威士忌。

去到行程尾聲，當然就係返返去台北市，導遊都好好人咁安排左係台北101附近俾大家落車，而我就慢慢行返去酒店。

• 旅行生活