台灣之旅 – 宜蘭‧花蓮‧Kavalan酒廠 Day Tour

#台灣之行 #Day3

宜蘭，花蓮，蘇澳呢d地方，相信都係比較少香港人遊台灣既首選，而我揀左呢個daytour既主要目的係可以去Kavalan酒廠參觀，當然呢度既風景實在幾靚，值得同大家分享下。

出發之前，就已經搵左klook 睇下有乜野local tour 可以參與。當見到有一個團係可以去宜蘭花蓮，仲有得去埋台灣兩大威士忌酒廠之一，位於宜蘭縣入面既Kavalan酒廠參觀。對於一個酒鬼黎講，絕對係一個最好既選擇，唔洗自己搭車過去，亦都唔洗自駕遊（本人唔建議任何人酒駕），有導遊渣車呀嗎😊。

如果大家有興趣的話，可以㩒呢度睇下個行程（小弟暫時仲未有優惠碼R到返黎🙏）

Day tour當日，朝日8點半去到台北車站報到，等待嗰陣我當然問下導遊呢d團多數會有咩人參加？導遊話主要都係台灣本地人，我心入面已經驚左一下，如果一陣間黎既人全部都係台灣人的話，以我既普通話溝通能力就真係雞同鴨講咁款。但最估唔到既係，同團既團友竟然係台灣出緊trip，喺美國工作嘅以色列人，仲有一個香港人，佢哋因為今日星期六放假所以就選擇出去玩。成個團搞到我好似成個外人咁😰，好彩大家嘅主要溝通模式都係英文，咁樣先至比較容易交流到。

台鐵係台北車站擺放既LDK58型蒸汽火車頭同LDR2201柴油客車，762mm軌距。可惜當日落雨，只係影到後車

上網睇返有關資料，LDK58型蒸汽火車頭1923年由日本車輛製造廠製造，於臺東線服役至1982年。而LDR2201柴油客車係1957年由臺北機廠參考日本國鐵80系電力動車組外觀製造，所以睇落都有少少日本風格。動力系統就配上Cummins NHHB-600引擎，係臺東線服役至1982年。因為2011年既一個展覽而搬到係呢度做展示品。

我哋行程既第一站去左位於蘇澳阿里史既冷泉公園，呢度係一個好似溫泉咁樣咁地下水出嚟嘅地方但係呢度湧出嚟嘅係凍水。呢度既水主要成份有二氧化碳同鐵質，所以泉水睇落黃黃地。因為大家都無預計會落水，所以大家都淨係睇下個冷泉，亦都有摸下d水，水溫有少少似岩岩係水井打上黎既水咁樣。

跟住就去咗豆腐岬，豆腐岬位於澳漁港東邊，因為係幾百萬年之前既地質運動，成個台灣由水底隆起形成，呢度喺台灣中央山脈嘅起點。現場見到既礁岩狀似豆腐，因為呢個咁特殊的景觀，故此就稱之為豆腐岬。我地慢慢咁沿住浴場（即係沙灘）傍邊既海岸步道行入去，行到盡頭可以見到一片片既岩石，仲有幾個應該二戰時期起落黎既軍事設施。