復活節既四日假期，當然黎一個短trip俾個人充下電，最令我意想不到既係呢一程飛機同由桃園機場去市區既特別體驗真係令我有d懷疑呢一個國際機場係唔係有宵禁。

我揀咗放工之後即刻搭車去機場準備上飛機去台北。雖然呢個到達時間喺香港嚟講算係幾方便，但原來去到台灣係有少少令人失望嘅。

當初睇過唔同公司嘅機票，因為長榮航空呢一班機係用波音787-10執飛，我對波音787有相對嘅興趣所以就揀咗呢一班機，喺度online check in嗰陣見到呢班機只係提供餐盒，所以我入咗閘之後就喺food court度食完晚餐先上飛機。

我揀咗呢一間有Gordon Ramsay開嘅餐廳做我嘅晚餐，我揀咗fish and chip，可以肯定既係呢個餐係即叫即整，上到手係熱到辣手，可惜呢一個餐無論係炸魚，碗豆定係薯條都係比較鹹，好彩仲有杯可樂可以幫我平衡一下😅

差唔多夠鐘上飛機嗰陣，我就去咗閘口排隊，當然梗係做啲例牌嘅打卡動作啦，四年冇見原來已經改變咗咁多，由當年嘅登機牌淨係得一個LCD Mon變到而家咁大塊LCD Mon連埋啲動畫/廣告。

成程機其實由上飛機嗰一下開始，直到降落部飛機都係唔係好夠冷氣，直頭覺得成班飛機熱到有出汗嘅感覺。我本身以為係呢一班既機師空姐選擇唔開咁強勁冷氣，可惜去到回程坐另一架飛機依然係咁熱。

當到達左桃園機場之後，可以算係一個幾無助既時刻。當我落左飛機，過埋海關攞埋行李，已經係半夜十二點。以一個國際機場嚟講，呢個時間出去台北市區嘅選擇竟然只係得返的士，機場巴士，uber。桃園機場捷運前往台北車站嘅尾班車原來已經喺22：55開出咗，如果大家想去台北既話，真係盡量避開揀係呢一個時間之後到達既班次。就算你預先租咗車都唔一定有得即場攞車，因為現場唔少租車公司嘅辦事處都已經閂咗門，所以我就揀咗由國光客運營運嘅機場巴士出台北車站再轉的士去酒店。

我到步嘅第一件事就係去咗充值嗰張悠遊卡，跟住就上返去巴士站嗰邊買車票。之後就要去車站度排隊等上車，最大問題係佢哋嘅機場巴士係客車規格，每架車最多都只係得50座，雖然我喺頭站（即係桃園機場第二航廈）上車，但每一班車都要預留相對嘅空位，過去第一航廈接載啲乘客，所以我都要等到第四班車先至可以上到巴士。

上咗車之後大概要一個鐘頭時間就去到台北車站，上車嗰陣車長會幫手拎你嘅行李上行李倉，你要記得攞埋行李嘅識別貼紙，喺你落車嗰陣認領返件行李。落到台北市區之後，車長竟然開金口同大家介紹台北嘅酒吧同埋夜市，呢一個咁貼心嘅服務真係令人意想不到，絕對係一個專業車長嘅示範。

其實而家越嚟越多夜晚機落地，如果可以喺週末或者長假期嗰陣加長機場捷運嘅服務時間，至少令到大家快少少可以去到台北車站，改善一個地方對旅客嘅第一印象。

• 旅行生活